Kahkashonning kuloli
Loy ezmoqqa joʼnabdi.
Kokili ming tilloli
Qizgʼaldoqlar qonabdi.
Koʼnglim qobirgʼasida
Binafshani koʼrsaydim.
Osmonning yoʼrgʼasida
Vaxshivorga borsaydim.
Koʼzlarimning yogʼida
Nolalar koʼkarmakchi,
Xayolning “Ushshogʼi”da
Volalar koʼkarmakchi.
Vaxshivorga borganlar
Аrazlarim bor,sizga!
Maysada oʼltirganlar
Havaslarim bor,sizga!
Otam yasharibdilar,
Onam yasharibdilapr,
Bahor yoqqan olovni
Yangam isharibdilar
Men shularning barini
Koʼzim bilan koʼrsaydim,
Boshlab yoshu qarini
Vaxshivorga borsaydim!..
07.03.1992 yil.
Muhabbat na boʼlgʼay endi,
muhabbat qayga ketmishdir,
Qadahda may edi baxtim,
uni qay yotlar ichmishdir.
Na boʼlgʼay, oʼrgandi koʼnglim
Fuzuliydan qaroligʼni,
Bu ishq shatranjida meni
qaysi baxti bor yutmishdir?!
Na taqdir, na yozuqdur bu,
na oʼtmish va kechmishdir,
Mening sokin bahorimni
shamollar qayga sochmishdir.
Umidim shul erur jonim
ipini endi oh yechmishdur,
Shu Elda yana bir Qayskim
Kaʼbada Ishqdan soʼz ochmishdir!…
**
Maqsading na erdi yellara sochding,
Ishqing yuraginga solgan yogʼduni.
Maqsading na erdi, jismima sanchding,
Qotil qoʼlidagi xanjar orzuni.
Maqsading na erdi yellara sochding,
Karbalo dashtidan kelgan iforni,
Nechun haydolmading, eshiging ochding, –
Seni sevolmagan bitta bahorni?!
Jonning kosasidan oqqan taryokni,
sumani munavvar, sarvi bebokni,
May kosaga bergan soʼnggi saboqni,-
Maqsading na erdi yellara sochding….
**
Dilning devoriga tegibdi boshing,
Lablaringni chimdi, gʼunchadahonim.
Yana bir lahza kut toʼkmoqqa yoshing,-
Soʼzim soyasida qolgan jahonim!
Kelgani-
ketmagu , ketmak-kelgani,
mulki muhabbatim,
mulki hayronim,
kipriklar damidan vayron boʼlgani
soʼzim soyasida qolgan jahonim!
Oshiqlar qabridan shimizib siyoh,
Vola yafrogʼiga chizdim titroqni.
Bu titroq tagida dunyo yosh giyoh
kabi tutib turar sufiy tuproqni!
Bir kun davrim kelsa davralarda xush,
Oʼltirsam qonatib bagʼri figʼonim.
Meni berkitsayding shunda koʼngilxush,
Soʼzim soyasida qolgan jahonim!
Ishqning sunbullari toʼkkan xotira,
Oʼqirkan dunyodan maqsad-duoni,
Yana bir lahza kut, ketma, bokira,
Kut, seni sevmoqchi boʼlgan dunyoni,-
Soʼzim soyasida qolgan jahonim!
29.10.1993 yil
Gulandom Togʼaeva
@shoira_Gulandom