1
Bir go‘zalning yuziga ming ehtiyojim bor,
Ishq usturlobida rashkdan rivojim bor.
Na bilsin g‘ofilu bedil sog‘inchdan nolalar qilsam,
Sochining atriga nolon seningdek bir me’rojim bor. …
2
Necha kunki sizsizman,
Ko‘kda oftob ham xira.
Holim so‘raydi barcha,
Ko‘nglim topilmas sira.
Necha kunki sizsizman,
Xayollarim parishon.
Go‘yo oyoq- qo‘lsizman,
Befayz hatto kahkashon.
Necha kunki sizsizman,
Quvontirmas bahor ham.
Ko‘nglimni ocholmaydi
Men sevgan serial ham.
Faqat dardimga malham
Siz yurgan ul ko‘chalar.
Daydi shamollar esa
Ishqingizdan kuy chalar.
Buncha jo‘shqin, buncha sho‘h,
Bahoroyning suvlari.
Meni sevdirdi do‘stning
Chiroyli orzulari…
3
Toshkentda qor, ko‘ngilda bahor,
Bu bahorning egasi sensan.
Meni shuncha sevdirib qo‘yib,
Nechun telefon qilmaysan, jimsan?!
4
Yetti qavat bu osmon,
Besh yuz yillik yo‘l ekan.
Uni yaqin qilguvchi
Sevilgan ko‘ngil ekan.
Sen quyoshsan, kelasan,
Har tong shu’la,o‘t bo‘lib.
Yashayapman shunchaki
Yoningda unut bo‘lib.
Besh yuz yillik yo‘lga ham
Duom bormay qolmaydi.
Faqatgina bir dilga
Sevgim yetib bormaydi.
5
Sevguvchi yo‘q meni bunda
Dunyosiga aldanganman.
Insonlikning ajib kibru
Havosiga aldanganman.
Umrim atrin sochdim yelga,
Gullar uni hidlarmikan?
Asli mehri yo‘q zotlarning
Da’vosiga aldanganman…
6
Eslash- ko‘rishdan ortiq,
Ko‘rish-suyishdan ortiq.
Diydoringga sel bo‘lish-
Baxtga to‘yishdan ortiq.
7
Bu o‘tkinchi dunyoda
Gohi shoh goh g‘aribman.
Yetti dunyoni kezib
Men sizni axtaribman.
Ishq-tegirmon ayrildi
Bug‘doyimu somonim.
Shu ko‘zlarga munosib
Bo‘lish yolg‘iz armonim…
8
Ochilib-sochilib yurgin bog‘larda,
Ishqing yuragimda g‘olib chog‘larda,
Buncha chiroylisan, shirin, o‘ktamsan,
Yayrab yuray desam menga sen kamsan…
9
Oshiqlik-yoningdan ketolmay qolish,
Har tongda ismingni aytib uyg‘onish,
Ishq-bu firoq bilan bahru bayt ekan,
Visol-tushlaringni suvga ayt ekan.
Sen nursan, osmondan baxt bo‘lib tushgan,
Men tongman, shu’lani hovuchlab ichgan.
Men seni sog‘inib keldim dunyoga,
Yur ketdik tog‘larga –Surxondaryoga!
Gulandom Tog‘ayeva