Tashvishlarga ko‘milib qoldim… – deysiz. Bu tashvishlar ichida chorasiz qolib ketishdan qo‘rqasiz. Yengillik topishdan umidvor bo‘lasiz. «Buyog‘iga nima qilay» – deysizmi? Qur’onni oching. Ra’d surasining 12-oyatini o‘qing: «U sizlarga qo‘rqqan va umidvor bo‘lgan holingizda chaqmoqni ko‘rsatadigan va og‘ir bulutlarni paydo qiladigan Zotdir» – deyilgan unda. Nega qo‘rqqan va umidvor bo‘lgan holimizda Rabbimiz chaqmoqqa ishora qilyapti? Og‘ir bulutlarni paydo qilgani haqida eslatyapti?.. Aniqlanishicha, fan tilida «chaqmoqli bulutlar» deyiladigan og‘ir bulutlar o‘z tarkibida 280-300 ming tonnagacha suv olib yurarkan. Shuncha miqdordagi suvning boshimizga birdan ag‘darilishini tasavvur ham qilolmaymiz, chunki bunaqasini ko‘rmaganmiz. Biz bu og‘ir qora bulutlar ostida ezilib qolmaymiz. Ko‘zimizga yengil suzayotgandek ko‘rinadigan bu bulutlar yoqimli yomg‘irlarni yog‘dirib, o‘z yo‘liga ketadi… Bu-ku mayli, hatto quyoshli kunlarda ko‘k yuzida pardek suzib yuradigan oppoq bulut parchalarning og‘irligi o‘rtacha 80 nafar fil og‘irligiga teng bo‘lar ekan. Shu parchalardan biri boshimizdan bosib tushsa nima bo‘ladi?! Butun umr shukr qilib yashashimiz uchun shuning o‘zi yetarli emasmi? Siz bo‘lsangiz «Tashvishlar yuki ostida qoldim», – deb o‘tiribsiz. Tashvishlaringiz ham og‘ir bulutlar singari yengilgina qiyinchilik yog‘dirib, o‘z yo‘liga ketadi. Yetarki, siz bandaligingizni qiling. Internet manbalaridan olindi. @shoira_Gulandom
