DIL SOGʼINGАN INSONLАR
Muhabbat -oltin-kumush,
Qadrin bilmas yomonlar.
Eslasa yigʼlar emish,
Dil sogʼingan insonlar.
Bogʼingda bir rayhonman,
Unutmanu payhonman.
Gul uzgani kechikma,
Kuz kelsa men tamomman.
Garchi oʼsha oy-quyosh,
Oʼsha-oʼsha osmonlar.
Mijgonlari emish yosh-
Dil sogʼingan insonlar.
Baxtsizlikning totidan
Koʼp odamlar omonlar.
Har kuni xat bitarmish,
Dil sogʼingan insonlar.
Ishq neligin bilarmish,
Rangi-roʼyi somonlar,
Gulzorimga kelarmish,
Dil sogʼingan insonlar…
Dilkash davralarning yarashigʼisan,
Kulsang kulging kabi sharqiroq soy yoʼq,
Yoʼllarda gul tutgan oshigʼing qancha,
Faqat hayotingda men uchun joy yoʼq.
Koshki eshigingda bir zanjir boʼlsam,
Oʼtgan-qaytganingda qoʼnsam qoʼlingga.
Koshki bir soʼz boʼlsam tansiq va soʼlim,
Titrardim yaproqday olsang tilinga.
Osmonday muhabbat bilan kelsam ham,
Zaminday zalvorli boʼlsa ham tuygʼum,
Ne qilay, sen kutgan ul yor emasman,
Koʼnglingning dardini ololmas sevgim.!
Har kuni sovgʼalar ulashasan sen,
Hatto yoʼlingdagi bolachalarga,
Men esa rashk bilan qarab qolaman,
Ular qoʼlidagi kulchachalarga.
Umidim, armonim, toleyi bekam,
Baxtim osmonida bir sen-humoy yoʼq.
Yoningda sollanib yurayin desam,
Sening hayotingda men uchun joy yoʼq.
Yigʼlagan koʼzlar ham qoraymas endi,
Hijron boylik boʼlsa, mendayin boy yoʼq.
Yoʼling toʼlib-toshgan sevganlaringa,
Faqat hayotingda men uchun joy yoʼq….
Аrzi hol
Bayramlar koʼchamdan oʼtmay ham qoʼygan,
Endi dil sendan soʼz kutmay ham qoʼygan,
Ertakda ekan-ku yoriltoshlari,
Hozir tosh hech kimni yutmay ham qoʼygan.
Bahorda kurtakday ketgayman yashnab,
Kuzda yaproq kabi boʼlgayman xazon.
Qaniydi shu toshlar yutsaydi meni,
Qadrsiz boʼlmasdim balki hech qachon.
Hozircha… Zaminda borman, omonman,
Kim uchun baxtmanu yolgʼiz imkonman.
Senga yoqmasa ham shu mavjudligim
Oʼzimcha kimgadir tayanch-osmonman.
Osmon-chi bulutsiz boʼlmaydi aslo,
Kezadi darbadar unda ham ham chaqin.
Bu chaqin seni ham etgay mubtalo-
Mening koʼchamda ham bayramlar yaqin!
Gulandom Togʼaeva
